AUA - Concert da la fuormaziun vocala ENsemble. L’aua murmura, scutta, cloma. Da dudir sun chanzuns our da la litteratura classica e contemporana, in diversas linguas.

ENsemble es üna fuormaziun da 13 chantaduras e chantadurs laics da l’Engiadina Bassa chi’d es nada dürant l’utuon 2023. Il plaschair dal chant a cappella, l’ingaschamaint persunal a bön dad ün bel cling e la vöglia da lavurar vi da l’aigna vusch sun ils elemaints principals chi collian las commembras ed ils commembers da quista fuormaziun.

Il tema dal proget da chant 2024 da l’ENsemble es "aua". L’aua chi murmura, chi scutta, chi cloma. Il concert spordscha dad üna vart üna tscherna da chanzuns our da la litteratura classica da Bach, Brahms, Mendelssohn e Rheinberger. Seguind il cuors da l’aua lung ils flüms Shenandoah ed il cuntschaint Moon River, plachaina lura in lommas rumantschas e talianas. No rivain Pro’l Rom (illas duos versiuns da Robert Cantieni e Nuot Vonmoos) o lura eir a la riva da l’En, cun üna cumposiziun da Peter Appenzeller chi dechanta nos flüm sco ün bindè blauaint chi rechama nossa vallada. Il program vocal gnarà inrichi dad intermezs da gïa.