Herzlich willkommen i de Guggemusik Chieferschüttler!

Im Mai 1992 simmer grindet wordä. Das isch scho äs Zitli här. Viär wo anäduäzis scho irgend inäs Guugi inä bläsä hend oder so, sind hit nu aktiv drbiä. Und äis isch wider cho. Damals hemmer d Liäder mäischtens so alli midänand «gschribä». Aso uifgrschibä hemmer ja niid, mä hed äifach chli Ten gsuächt bis si passt hend, diä hemmer iis gmerkt und so sind diä Liäder meh schlächt as rächt stand cho. Luschtig isch, dass mer hit nu äis LIäd vu damals diänd spilä.

Wemmer alli Liäder wurdi uifzellä, wo mer scho mal probiärd hend, das wurd dr Rahmä vu derä Internetsitä sprengä. Wenns mal bi dr Trumpetä so äinigermassä gstumä hend und bi dr Posuinä oi, de hends am Schluss ganz sicher nid zämä passt. Susis hemmer am Afang (zum Glick) nu gar nid gha.
Troztdäm simmer ganz guäd i iisi erschti Fasnacht gstarded. Giswiler hend fräid gha a iis und hend gstuinded was miär stand bracht hend. Aber z Chläid isch ächt dr «Horror» gsi.

Glich oiforisch simmer is zwäitä Jahr, doch denn heds nid so rächt wellä.
Irgend wenn heds denn langsam afä Komissionä gä. Mer hend iis organisierd und entwickled.

Bim fifjährigä Jubiläum hemmer dr Rekord a Mitglieder gha. Miär sind fascht viärzg Stuck gsi.

Nid vergässä darf mä natirli, diä all zwäijahrlichä Häiläits: Nordrach. Läck simmiär stolz gsi, uf Ditschland derfä gu spilä. Oi dr Kaffee-Sepp und dr Flagge-Sepp hend fräid gha a iis. Und all midänad hend «Muh Mäh» gsungä.

Das äs paar Uiszig us altä Ziitä.
Chuim isch de s fifjährigä durä gsi, sind immer weniger wordä. Miär sind aber immer äs luschtigs Hiifäli gsi und hend guäd gha.
Miär sind alli stolz, dass mers so wiit bracht hend. Äs isch aber nu lang nid fertig. Vo Jahr zu Jahr gäbid miär alles, um iis z verbesseärä. Kameradschaft sell natirli oi nid z churz cho. Wenn iis nu eper wet tatchreftig unterstizä, miär hend nu äs paar Plätzli fri.